بە نزیکبوونەوە لە ڕۆژی ٢٥ی نۆڤەمبەر ڕۆژی جیهانی دژ بە توندوتیژی ژنان، ژنانی باشووری کوردستان گوڕ بە چالاکییەکانیان دەدەن. لەو چوارچێوەیەدا، لە ڕاگەیەندراوێکدا، كەمپەینی “یەکریزی ژنان دژی توندوتیژی و داگیرکاری”، بەدروشمی “بەیەكریزی ژنان لە دژی توندوتیژی و داگیركاری تێدەكۆشین” هەڵمەتی بەرەنگاربوونەوەی توندوتیژی دژ بە ژنان ڕاگەیاند و ڕێکخەرانی هەڵەمەتەکە داگیرکاری سەر باشووری کورستان بە سەرچاوەی سەرجەم کێشەکان دەزانن و خوازیارن، هەموو ژنان و پیاوان و لاوانی ئازادیخوازێک بەئەركی خۆی بزانێت لە هەڵمەتی بەرەنگاربوونەوەی توندوتیژی و بەرەنگاربوونەوە داگیركاری بەشدار ببن. ببنەوە.
تەواوی دەقی ڕاگەیەندراوەکە:
ئێمە وەك كەمپینی ژنان پێمان وایە سەرچاوە و ناوەندی تەواوی كێشەكانی باشووری كوردستان داگیركاریەكانی سەر باشوری كوردستانە. تەواوی هێزە داگیركەرەكانیش لەسەرو هەموویانەوە هێرش و داگیركاریەكانی توركیا و داعش و هاوكارەكانیان بەتەواوەتی لێدان لەژنان دەكەنە ناوەندی هێرشەكانیان. ئاشكرایە كە باشووری كوردستان یەكێكە لەو جێگایانەی كە زۆرترین توندوتیژی لەسەر ژنان تێیدا بەرێوەدەچێت. رۆژ نیە هەواڵی كوشتن و خۆكوشتنی ژنان نەبیسترێت بێگومان كوشتنەكان گەیشتۆتە ئاستی كۆمەڵكوژی. ئێمە وەك كەمپینەكەمان پێمان وایە هۆكاری سەرەكی تەواوی ئەم كۆمەڵكوژییانە عەقڵیەت و زهنیەتی دەسەڵاتداری پیاوسالاریە و تەواوی هێزە دەسەڵاتدارەكانیش زۆر بەمەبەست ئەم زهنیەتە قوڵـتر دەكەنەوە و بۆ ئەوەی كۆمەڵگایەكی توندوتیژ لە زهنیەت و كرداردا و بێ ئیرادە لە كەسایەتیدا بونیاد بنێت. ئاشكرایە لەباشوری كوردستاندا هەوڵدانەكانی ژنان زۆرن بۆ روبەروبوونەوەی زهنیەتی توندوتیژی، هەروەها باشوری كوردستان لە شەنگال هەتا كەركوك و تا دەگاتە بەهدینان و برادۆست و بناری قەندیل و هەولێر و سلێمانی و دهۆك و روبەروی داگیركاری سەربازی و كلتووری و ئابووری و سیاسی دەبێتەوە لەلایەن دەوڵەتی داگیركەری توركیاوە بەردەوامیش لەژێر هەڕەشەی داعش دان. ئێمە پێمان وایە تەواوی كێشەكانی باشوری كوردستان لە قەیرانی كۆمەڵایەتی و سیاسی و ئابوری هەمووی بەیەكەوە گرێدراوە و باجەكەی ژنان دەیدات. هەربۆیە ئێمە وەكە كەمپینەكەمان پێمان وایە بەیەكریزی دەتوانین بەرەنگاری تەواوی توندوتیژی و داگیركاریەكان ببینەوە. لەسەر ئەو بنەمایە كەمپینەكەمان دەست دەكات بە هەڵمەتی هۆشیاری ژنان و لەپێناوی بەرەنگاربوونەوە توندوتیژی و رێگەگرتن لە كوشتن و خۆكوشتنی ژنان. لەتەواوی شار و شارۆچكە و شارەدێ و هەتا تەواوی گوندەكاندا كۆڵان بەكۆڵان دەست بە ئەنجامدانی سمینار و كۆر و كۆبوونەوە دەكات. لە هەموو جێگە گشتیەكان كافتریا و جێگەی كاری ژنان و هەروەها لەگەڵ كردنەوەی قوتابخانەكاندا لە تەواوی زانكۆ و پەیمانگا و قوتابخانەی ئامادەیی و ناوەندییەكاندا سمینار پێشكەش دەكەین. هەروەها هەوڵ دەدەین بچینە ناو شەڵـتەرەكان و ناو زیندانەكان بۆ تەواوی ژنان و پیاوان سمینار پێشكەش بکەین.هەروەها لەگەڵ پێشكەشكردنی سمیناردا گرتەڤیدۆ و كورتەفیلم بۆ بەرەنگاربوونەوەی توندوتیژی پێشكەش بەئامادەبوان دەكەین. شان بە شانی ئەمانە شانۆ بۆ هەمان مەبەست لەتەواوی شوێنە گشتیەكان پێشكەش دەكرێت.
هەروەها لە ٢٥-١١-٢٠٢٠ لە تەواوی شار و شارۆچكەكاندا رێپێوانی جەماوەری ئەنجامدەدەین بەبەشداری تەواوی ئەندامان و رێكخراوەكانی ناو كەمپینەكە. داوا لە تەواوی جەماوەری باشوری كوردستان دەكەین كە ئامادەی چالاكیەكانمان بن و هاوكاربن بۆ سەرخستنی ئەم هەڵمەتەمان.
هەڵمەتەكەمان لە ١٧-١١-٢٠٢٠ دەست پێدەكەین هەتا ١-١-٢٠٢٠ بەردەوام دەبێت. لێرەوە داوا لە هەموو ژنان و پیاوان و لاوانی ئازادیخواز و هەموو كەسێك دەکەین بەئەركی خۆیان بزانن بەشداری بکەن لە هەڵمەتی بەرەنگاربوونەوەی توندوتیژی دژی ژنان و بەرەنگاربوونەوە دژی داگیركاری.
